Diversion road pasiraduhan sa Enero 21 sang hapon para sa Dinagyang ILOmination parade

ILOILO CITY — May road closure nga ipatuman sa Diversion Road sa Mandurriao sa Sabado, Enero 21 sang hapon tubtob sa gab-i para sa Dinagyang ILOmination parade nga hiwaton.

Suno kay Public Safety and Transportation Management Office (PSTMO) Head Jeck Conlu, maga-umpisa ang closure las-3 ukon las-4 sa hapon tubtob las-9 gab-i.

Magapaindis-indis sa nasambit nga event ang pito ka mga tribu suksok ang ila maduagon kag nagasiga nga mga costumes.

May tatlo ka judging areas ang nasambit nga kompetisyon— isa sa Atria, SM City, kag Megaworld area.

Dugang pa ni Conlu, mabatyagan na ang moderate to heavy traffic umpisa sa Enero 16 bangud sa gina-construct nga stage sa mga judging areas.