Mga pulis nga naga-duty malapit sa mga balay ilimnan sa Iloilo City ginlaygayan nga indi maghalin bisan lapaw na sa ila deployment time
ILOILO CITY – Indi dapat pagbayaan sang mga pulis ang ila area of assignment ilabe na sa mga malapit sa balay ilimnan kun madamo pa sang tawo.
Ini ang laygay ni Iloilo City Police Office Director PCOL Leo Batiles bisan nga tapos na ang deployment time sang mga pulis.
Suno kay Batiles, may pulis nga naka-deploy malapit sa mga balay ilimnan para madasig nga makaresponder kun may mga ginamo.
Naga-umpisa ang duty sang mga pulis las-6 sa gab-i tubtob las-4 sa kaagahon.
Pasado las-4 kahapon sang kaagahon, Enero 15, sang nagrambol ang duha ka grupo sa idalum lang sang Aksyon Radyo Iloilo.
Ginpahayag ni Batiles nga bag-o lang nakahalin ang na-deploy nga mga pulis sa area sang natabo ang rambol.
DISAPPOINTED
Wala nanamian si Mayor Jerry Treñas sa kun paano gin-handle sang police ang natabo nga rumble sa idalum sang Aksyon Radyo sang Enero 15 sang kaagahon.
Suno sa alkalde, disappointed siya kag wala siya nalipay.
Ginmanduan na niya si PCOL Batiles nga magpasaka sang kaso batuk sa mga involved.
Dugang niya, ang natabo indi dapat mag-reflect sa City Government kundi sa mga PNP personnel.
