Dinagyang

Wala-tuo nga aktibidad sa Dinagyang 2023 masaksihan subong nga semana

ILOILO CITY – Masako na ang preparasyon sang nagkalain-lain nga komitiba sang Iloilo Festivals Foundation Incorporated (IFFI) ilabe na sa mga major events sang Dinagyang Festival 2023.

Suno kay IFFI Executive Director Joyce Ann Clavecillas, wala-tuo nga mga aktibidad ang lauman sang mga Ilonggos kag mga pangayaw subong nga semana.

Sa Enero 18 sang hapon may motorcade sa imahe ni Senior Sto. Niño sa mga mayor nga dalanon kag pagkagab-i ang ginakalangkagan nga Miss Iloilo 2023 Grand Coronation Night sa Iloilo Convention Center.

Buksan naman ang Food Festival sa Enero 19 sa magkatuhay nga dalanon sa City Proper nga magalawig tubtob Enero 22 kag Fluvial procession sa Enero 20.

Hiwaton sa Enero 21 ang “Kasadyahan sa Kabanwahanan” nga pasakupan sang walo (8) ka mga tribu; pagka-hapon ang Sponsor’s Mardi Gras; pagkagab-i ang Grand Religious Sadsad sa San Jose Parish kag Dinagyang ILOmination Tribes Competition nga pasakupan sang pito (7) ka mga tribu sa Mandurriao.

Balantayan naman suno kay Clavecillas, ang highlight gid nga “Dagyang sa Barangay” Tribes Competition sa Enero 22 sang aga sa diin mapaindis-indis ang walo ka mga tribu; pagkahapon ang Dinagyang Drum Beat Competition; kag pagkagab-i ang Awarding Ceremony.

Ginpahayag pa ni Clavecillas nga may pilian ang mga Ilonggo kag pangayaw sa mga luyag nila nga lantawon nga mga aktibidad.

aksyonradyoiloilo

Aksyon Radyo Iloilo is the No. 1 station in both AM and FM bands in Iloilo based on April and September 2023 and June 2024 Kantar Media surveys.

Leave a Reply