Pag-regulate sa hiring sang mga bouncers sa Iloilo City ginaduso ni Councilor Plaridel Nava
ILOILO CITY – Ginaduso ni Iloilo City Councilor Plaridel Nava ang pag-regulate sa pag-hire sa mga bouncers sang mga private bar kag night club sa siyudad.
Ini bangud may katungdanan ang mga bouncers sa pagpabilin sang kalinong kag katawhay sa establisemento sa diin sila nagatrabaho, paghatag proteksyon sa ila customers kag mga propiedad, suno sa konsehal.
Naplastar sa draft ordinance ni Nava nga dapat legal age ang ma-apply nga bouncer, high school graduate, wala sang criminal record, physically kag mentally fit.
Kun makapasar ang ordinansa, gina-require man sila nga makapasa sa neuro, psychiatric, kag drug test. Dapat magsumiter man sila sang NBI, police, kag court clearances agud masiguro nga wala sang ginapangatubang nga kaso.
“Kinahanglan may training man siya (bouncer) because daw pareho man lang ang iya nga trabaho sa security guard which is to maintain peace and order, protect life, protect properties kinahanglan magkuha man siya sang the same training sa PNP naton,” suno kay Councilor Nava.
Dumilian naman nga magbitbit sang armas ang mga bouncers.
Base pa sa draft ordinance nga ang private bar kag night club kinahanglan nga magsumiter sa Iloilo City Police Office (ICPO) kag Public Safety and Transportation Management Office (PSTMO) kada bulan sang listahan sang tanan nila nga mga bouncers lakip ang kumpleto nga ngalan, address, contact number, kag petsa sang initial employment.
Ang ICPO kag PSTMO man ang ma-enforce sa mga probisyon ordinansa kag may penalidad ang mga malapas.
Natalana nga talakayon sa first reading sa session sang Iloilo City Council ang proposed ordinance.
