NTC6, mga telcos gin-imbitar sa consultative meeting agud ma-assess ang epekto sang signal shutdown sang Dinagyang Festival
ILOILO CITY – Mapatawag sang consultative meeting ang Committee on Public Utilities sa Iloilo City Council sa Enero 26 agud ma-assess ang nangin epekto sang ginpatuman nga signal shutdown sang Enero 21 kag 22 kadungan sang highlights sang Dinagyang Festival.
Una nga gin-ulan sang reklamo ang ginpatuman nga signal shutdown tungod madamo ang naapektuhan lakip na ang mga online transactions.
Suno kay Councilor Romel Duron, gin-imbitar ang taga-National Telecommunications Commission (NTC) 6, mga telecommunications companies, kag Iloilo City Police Office (ICPO) sa meeting agud mapaathag nila sa publiko ang natabo.
Puwede suno sa iya nga magamit bilang basehan sa masunod nga Dinagyang ang mangin resulta sang ipatawag nga consultative meeting.
“Actually, mapatawag naman ako sa Huwebes, we call it dialogue or consultative [meeting] to assess what really happened sang Dinagyang or sa two days abi nga natabo kag for future reference man. Even si Mayor [Jerry Treñas] signified nga kun puwede wala gani sang [signal] shutdown,” suno kay Councilor Duron.
Antes ginpatuman ang signal shutdown, ginpaathag sang ICPO nga limitado lang sa pila ka areas sa diin hiwaton ang performances sang mga competing tribes ang signal shutdown pero naapektuhan ang bug-os nga siyudad kag kaiping nga kabanwahanan, kag porsyon sang Guimaras.
Sang damlag lang, nagpabutyag man si Mayor Jerry Treñas nga indi na niya pagrekomendar sa masunod nga Dinagyang ang signal shutdown.
