Nagaginutok nga pasahero sa sulod sang modernized jeep ginreklamo sang concerned citizen

Ginpautwas sa Aksyon Radyo Iloilo sang pasahero sang modernized jeep nga may ruta Ungka – La Paz via ISAT-U ang iya kalain sang buot nga na-experyensiyahan sang nagsakay siya sa jeep.

Suno kay alyas Joy, tuman ka gutok ang sitwasyon sang mga pasahero kag halos indi na makahulag sang maayo.

Paathag niya, nagasige lang ka pasaka sang pasahero ang konduktor bisan nga gutok na ang sulod sang jeep.

Masobra 20 ka mga pasahero ang standing position magluwas pa sa mga nagapungko nga nagaginutok man, suno pa kay Joy.

Madamo suno sa iya sang mga pasahero nga nagreklamo apang wala ginpamatian sang konduktor.

Halos kada hapon, ini ang experyensya ni Joy sa kada magsakay siya sa modernized jeep nga may kasubong nga ruta.

Ginakalabak-an ni Joy nga ma-aksidente ang jeep tungod nga overloading.

Ginatinguhaan sang Aksyon Radyo news team nga makuhaan ang paathag ang management sang kooperatiba sang modernized jeep.

MADAMO ANG PASAHERO KUN PEAK HOURS

Gin-ako sang driver sang modernized jeep nga may ruta Ungka – La Paz via ISAT-U nga madamo sang mga pasahero sa peak hours rason nga nagaginutok.

Ini suno kay Pearl Joy Jamorin, general manager Santa Barbara, New Lucena Iloilo Transport Cooperative kasunod sang meeting nga ginhimo upod sa mga drivers kag mga konduktor tungod sang concern nga ginpa-utwas sang pasahero.

Una na nga ginpabutyag sang tagreklamo nga si alyas Joy nga tuman ka gutok ang sitwasyon sang mga pasahero kag halos indi na makahulag sang maayo.

Pero ginpabutyag ni Jamorin nga indi matuod nga masobra sa 20 ka mga pasahero ang standing position nga una ginpabutyag ni Joy.

Sa pagpangusisa niya, nagaginutok ang mga pasahero kada Lunes tungod indi na ma-control ang mga nagasaka.

21 ang seating capacity kag 10 ang standing capacity sang modernized jeep suno kay Jamorin.

Tinguhaan ni Jamorin nga bantayan agud makontrol ang volume sang pasahero nga magsakay sa modernized jeep.