Pagsirado sa entrance gate sang Western Visayas Sanitarium Gen. Hospital ginreklamo

ILOILO – Ginreklamo sang mga residente ilabe na sang mga tricycle drivers sa Bolong Este kag Bolong Oeste, Santa Barbara ang pagpasirado sang gate sang Western Visayas Sanitarium General Hospital nga wala sila ginkonsulta sang management sang ospital.

Suno kay Bolong Oeste-Bolong Este Tricycle Owners and Drivers Association (BOBETODA) President Noli Sugon, wala man sila ginpahibalo sang chief of hospital sa amo nga desisyon.

Ginpahayag ni Sugon nga wala gid ginarespeto sang management ang naga-egsister nila nga memorandum of agreement.

Pila na ka tuig suno sa iya nga nagabiyahe sila tubtob sa entrance gate sang ospital gani mabudlayan sila kun malibot pa sila.

Ang ginareklamo nga entrance amo ang alagyan pakadto sa emergency room kag naandan nga alagyan sang mga pribado nga salakyan nga may karga nga pasyente.

Sa pagpangusisa sang Aksyon Radyo news team, ginhimo na nga exit ang amo nga entrance gani apektado ang adopted community nga malapit diri.

Ginpabutyag ni Sugon nga kinahanglan pa nila nga maglibot sa pihak nga gate tungod sa pihak man ginsaylo ang emergency room.

Makigkita naman si Sugon sa Lunes sa management sang ospital agud ipalab-ut ang ila concern. –via Cedrick Anona