Pila ka tricycle drivers nagapang-alang-alang magdul-ong sang pasahero sa Barangay Bakhaw, Mandurriao

ILOILO CITY – Indi na magdul-ong sang pasahero sa Barangay Bakhaw, Mandurriao ang pila ka tricycle drivers nga nagabiyahe sa Mandurriao.

Pahayag ini ni alyas Nonoy kasunod sang statement ni Police Major Rommel Anicete, head sang Regional Police Drug Enforcement Unit nga dakpon nila ang sin-o man nga maabtan sa vicinity sang ginakonsiderar nga drug den kun may himuon sila nga drug buy bust operation.

Suno kay Nonoy, natahap na sila nga magsulod sa Bakhaw kasunod sang pagkalakip sang pareho nila nga tricycle driver sa mga gindakup sa buy bust operation sa amo nga barangay sang Enero 25 sang gab-i pero nagapanindugan nga nagdul-ong lang sang pasahero.

Ginpahayag ni Nonoy nga may epekto ini sa kita nila pero nagapangaman lang sila.

Dugang ni Nonoy, halos 50 ang mga tricycle drivers sa ila gintukod nga asosasyon kag nahisugtan sa ila meeting sang nagligad nga semana nga indi sila magsulod sa Bakhaw, Mandurriao.