Lalaki patay sang natiruhan sang iya bayaw sa Anilao

ILOILO — Patay si Eduardo Dimavivas, Jr. 40-anyos sang Brgy. Sta Rita, Anilao, sang natiruhan sang iya bayaw nga pulis.

Suno kay Police Captain Jersy Besas, hepe sang Anilao Police Station, natabo ang insidente las 4:58 kaina sang hapon. May nagluntad nga komosyon sa tunga ni Dimavivas kag iya amay. Nagpangayo sang bulig ang amay ni Dimavivas kay Police Master Sergeant Rodel Rodriguez, assigned sa Anilao Police Station, nga kasilingan man lang sang mag-amay tungod tuyo nga bun-on ni Dimavivas ang iya amay.

Sang nakita ni Dimavivas ang pulis, nagdalagan siya pasulod sa ila balay kag nagkuha sang binangon.

Paguwa niya, nasugata niya ang iya bata nga babaye nga walo ka tuig, gin-uyatan samtang ginasaruso ang pulis.

Napilitan si Rodriguez nga tiruhon ang iya bayaw nga naigo sa ulo, wala nga dulunggan kag wala nga abaga.

Nagsungka sa Anilao police si PMSg Rodriguez.

Ginahulat naman sang Anilao police ang desisyon sang pamilya kon mapasaka sang kaso batuk sa pulis.