8 ka manok nasapwan nga wala na sang kasudlan sa Balasan
ILOILO — Nasapwan sang residente sa Brgy. Salvacion, Balasan nga wala na sang kasudlan ang mga ginasagod nga manok sang iya pakaisa las 6 sang aga sang Pebrero 1.
Suno kay Archie Laguda, ihawon kuntani sang iya pakaisa ang mga manok para sa birthday sang iya bata apang nakibot sang nadiskubrehan nga wala na ang mga ini sang mga kasudlan.
Sa ila nga pagpangusisa sa mga manok, ginkagat sang “indi ordinaryo” nga sapat ang ila mga hinuptanan.
Palaligban naman sa pamilya kun ano nga sapat ang nag-atake sa mga manok.
Nagdesisyon na lang ang pamilya nga ilubong ang mga manok kag magbakal sang manok para ihanda sa birthday.
Wala na ginpa-blotter sang pamilya ang insidente.
