Ungka flyover wala gina-angkon sang Pavia LGU –Pavia Mayor Luigi Gorriceta
ILOILO — Indi ang Pavia Local Government Unit ang nagapanag-iya sa multi-million project nga Ungka Flyover.
Ini ang reaksyon ni Pavia Mayor Luigi Gorriceta sa pahayag ni Iloilo City Mayor Jerry Treñas nga Pavia Flyover ang imprastruktura kag indi Ungka, Iloilo City Flyover.
Suno kay Gorriceta, ginabuligan sang Iloilo City Government kag Pavia LGU ang paghatag sang temporaryo nga solusyon ilabe na gid ang pagmanehar sang trapiko samtang ginakay-o pa ang flyover.
Dugang niya nga ang approach sang imprastruktura malapit sa arrival area sang Ungka ITGSI terminal ang nahamtang sa Ungka, Jaro nga parte pa sang Iloilo City tubtob sa gasolinahan.
Ginabanta sang alkalde nga 20% sang flyover ang yara sa Iloilo City samtang 80% naman ang sakop sang banwa.
Kabahin man ang Ungka Flyover sang national government project rason nga wala ini ginapanag-iyahan sang Pavia.
Natabuan lang suno pa kay Gorriceta nga ang daku nga poryson sang flyover ang nahamtang sa Pavia.
Wala pa ma-turnover sang DPWH 6 ang proyekto sa duha ka mga LGUs antes nakitaan sang vertical displacement tungod nagapadayon ang ila construction.
Nagpasalamat man siya sa partnership sang PSTMO sang Iloilo City government sa pagbulig sa Pavia LGU sa pagdireher sang trapiko sa idalom sang Ugka Flyover.
