P1.7 million nga balor sang suspected shabu na-recover sa mag-live in sa Roxas City
CAPIZ — Na-recover ang P1.7 million nga balor sang suspected shabu sa mag-live-in partner nga subject sa drug buy bust operation sa Brgy. Banica, Roxas City, Capiz las-8:46 kahapon sang aga, Pebrero 8.
Ginkilala ang mga nadakpan kanday Dennis Benitez, 48-anyos kag alyas Jurelyn sang Barangay Lawaan, Roxas City.
Base sa report, nabaklan ang duha sang isa ka sachet sang suspected shabu sa balor nga P20,000.
Magluwas diri, na-recover pa gid ang 16 ka sachets sang illegal drugs nga nagabug-at sang ginabanta 250 grams kag may Standard Drug Price nga P 1.7 million; digital weighing scale; kag mga gamit sang subject.
Masobra isa ka bulan nga gin-monitor ang mga subjects antes gin-operate sang Capiz Police Provincial Drug Enforcement Unit (CPPDEU) tungod natukiban nga nagabaligya sila sang illegal drugs sa bug-os nga Roxas City kag maka-dispose sang isa ka kilo, sa isa lang ka semana.
Ginakabig si Benitez nga high value individual sa drugs watchlist sang Roxas City Component City Police Station. Base sa record, nadakpan man sadto si Benitez sa drug buy bust operation, pero nakaguwa sa presuhan sang 2021 paagi sa plea bargaining agreement.
Ginpanginbulahan naman ni PRO6 Regional Director Police Brigadier General Leo Francisco, ang mga operatiba sang Capiz province sa ginhimo nga operasyon.
Suno sa pa sa iya, “Our campaign against illegal drugs in Western Visayas continues. Hindi ko hahayaang masira ang kinabukasan ng ating kabataan dahil sa iligal na droga. Pagtulungan po natin na masugpo na ang supply and demand ng iligal na droga.”
