Presidente sang employees association sa Iloilo City Hall nanginwala nga may ‘komisyon’ sa pagpatahi sang uniform sang mga empleyado sa private entity
ILOILO CITY — Gin-athag ni Mr. Rudy Catahay, presidente sang Resource Employees Association of City Hall (REACH), nga wala sang commission sa pagpatahi sang uniform sang mga empleyado sang Iloilo City Hall sa Santoyo Clotheline Creation nga naka-base sa Manila.
“Waay na ya hambal nga may commission commission da. Ka gamay nga kuwarta komisyunan mo pa na da?” suno kay Catahay.
Katuyuan sang pagpatahi sa private entity nga mangin presentable man ang mga empleyado sang City Hall, suno kay Catahay.
Una na ginpahayag ni Catahay nga kun isalig lang sa mga empleyado, wala man sila nagapatahi sang uniform kag polo shirt lang ang ila ginabakal. Ini ang rason kun ngaa nagtukod si Iloilo City Mayor Jerry Treñas sang Uniform Committee agud magproseso sang ila uniform.
Ginpabutyag man ni Catahay nga ginkonsulta ang mga empleyado parte sa pagpatahi sa private entity paagi sa mga board of directors sang REACH.
WALA NAG-AGI SA BIDDING PROCESS
Ginkumpirmar ni Catahay nga wala nag-agi sa bidding process ang pagpatahi sa private entity sang uniform sang mga empleyado.
Suno kay Catahay, nag-propose kay Mayor Treñas ang Santoyo Clotheline Creation nga nakabase sa Manila nga sila ang matahi sang mga uniform kag gin-aprubahan naman ini sang alkalde.
Sunod nga gintukod ang Uniform Committee.
I-proseso sang committee ang bayad sa pagpatahi sang uniform nga ibuhin sa clothing allowance sang mga empleyado kag ipaagi sa REACH nga amo naman ang mabayad sa manugtahi.
Nagreklamo ang iban nga mga empleyado tungod kadako para sa ila ang P3,400 nga ibuhin sa ila clothing allowance para sa pagpatahi sang tatlo ka blouse sang mga babaye kag P3,000 naman para sa polo barong sang mga lalaki.
Ginpabutyag pa sang mga naagreklamo nga sang una, ginahatag sa ila ang ila clothing allowance nga P6,000 kag sila na ang bahala nga mangita sang sastre.
Nagalab-ot lang sa P300 tubtob P500 ang isa ka blouse nga uniform sa ila sastre suno pa sa ila.
Dugang sang mga nagareklamo, automatic nga ibuhin sa ila clothing allowance ang bayad sa pagpatahi sang uniform kag wala sila ginhatagan sang iban nga option.
