Iloilo province yara na sa criteria sang ‘outbreak’ sa hand, foot and mouth disease — PHO
ILOILO – Yara na sa criteria sang “outbreak” ang probinsiya sang Iloilo kun basehan ang na-record nga kaso sang Hand, Foot and Mouth Disease (HFMD), suno sa Iloilo Provincial Health Office.
Ini tungod nagdamo ang kaso sang HFMD halin sang Morbidity Week 1 tubtob Week 5.
Suno kay PHO Head Dr. Maria Socorro Quiñon, madamo na nga barangays sa probinsiya ang naka-record sang nasambit nga balatian. Sa pagkamatuod suno sa iya, naglapaw sa “normal expectancy” sa isa ka komunidad ang na-record nga kaso.
Sa pihak sini, gin-athag ni Quiñon nga wala sang poder ang PHO nga magdeklarar sang state of calamity sa nasambit nga balatian tungod may proseso nga ginasunod.
Base naman sa monitoring sang Provincial Epidemiology Surveillance Unit (PESU), may 1,115 cases sang HFMD sa probinsiya pero nag-ayo na ang kadamuan sang mga natapikan.
Una na nga nagpahanumdom si Quiñon nga matapna ang amo nga balatian paagi sa pagsunod sa minimum health protocols kasubong sang masami nga paghugas sang kamot, pagsuksok sang face masks, pag-obserbar sang social distancing, kag proper waste disposal. Dapat man nga maglikaw sa pag-contact sa nga na-infect sang HFMD.
