Informal survey para lubos nga maintiendihan ang rason sa manubo nga performance rating sa traffic management sa Iloilo City, ginlunsar sang Aksyon Radyo Iloilo
Ginlunsar ang Aksyon Radyo Iloilo ang informal survey para mas lubos nga maintiendihan kun ngaa manubo ang ginhatag nga performance rating sa pagdumala sang traffic sa siyudad base sa ginpa-commission nga RACI survey ni Mayor Jerry Treñas.
Para mangin patas ang mga nagapangbudlay nga mga traffic personnel, imbes nga isentro lang sa pamangkot kun kontento ukon indi kontento, nagdugang ang Aksyon Radyo Iloilo sang mga pamangkot sa mga rason kun ngaa diskuntentado ang daku nga porsyento sang mga gin-survey sa pagdumala sang traffic sa siyudad.
Sang nagligad nga semana, ginpaguwa ni Mayor Treñas ang resulta sang survey kag ginapakita nga nakakuha sang negative 12% ang traffic management gani plano sang alkalde nga magkuha sang mga experts kag mag-coordinate sa Metro Manila Development Authority (MMDA) para makahimo sang training sa mga traffic enforcers.
Sa amo nga survey, wala nabutang ang rason sang sabat sang mga respondents.
Kahapon, ginlibot sang Aksyon Radyo iloilo news team ang mga terminals kag merkado.
UNGKA FLYOVER, ILLEGAL PARKING NAGAPANGUNA NGA RASON
Mayorya sa mga napamangkot sang Aksyon Radyo Iloilo news team ang nagsabat nga Ungka Flyover kag illegal parking ang rason kun ngaa madamo ang indi kuntento sa pagdumala sang trapiko sa siyudad.
Base ini sa initial nga resulta sang informal survey sang Aksyon Radyo Iloilo kaina sang aga.
Pulo (10) ka rason ang ginplastar sa survey form.
Sa 45 ka ginpamangkot sang team, 42 gid ang nagsabat nga ‘Tungod sa Ungka Flyover’ ang rason kun ngaa madamo ang indi kuntento sa traffic management sang siyudad.
Ginasundan ini sang ‘Illegal parking’ nga may 41 ka nagsabat. Naglab-ut naman sa 36 ang nagpili sang ‘Madamo nga ginakutkot sa karsada,’ 31 sa ‘Nagapanago ang iban nga traffic aides imbes maggiya sang traffic,’ kag 29 sa ‘Patarasak kag kwestyonable nga panakup sang traffic aides.
Yari ang iban pa nga resulta:
• Indi maathag nga traffic signs – 27;
• Pangilkil sang iban nga traffic aides – 24;
• Indi LTO-deputized ang mga traffic aides gani indi maka-confiscate sang driver’s license – 23;
• Mismo mga traffic aides wala naka-intiende sang traffic rules – 20; kag
• Nubo suweldo sang traffic aides – 12
