Ginakabig high value individual nadakpan sa drug buy bust operation sa Concepcion, Iloilo; Subject nakuhaan sang granada

ILOILO – Nadakpan sa drug buy bust operation ang street food vendor nga si Clint Monton sa Brgy. Poblacion, Concepcion, Iloilo kahapon, Marso 7.

Suno kay Police Major Harold Rendora sang Provincial Drug Enforcement Unit sang Iloilo Police Provincial Office (IPPO), 17 ka sachets sang suspected shabu ang na-recover kay Monton nga may market value nga P340,000.

Ginakabig suno sa iya, nga High Value Individual (HVI) ang subject kag Top 1 sa drug target list sang Philippine Drug Enforcement Agency (PDEA) 6.

Ginkumpirmar man ni Rendora nga magluwas sa suspected shabu, nakuhaan pa gid sang granada si Monton.

Base sa impormasyon sang PDEU, nagakuha sang supply sang illegal nga druga si Monton sa Iloilo City kag Negros Occidental nga ginapaagi sa sakayan.

Preso siya sa Concepcion Police Station kag ginatinguhaan sang Aksyon Radyo Iloilo nga makuhaan sang pahayag.