10 ka models mapasakop sa Pinta Tawo sa Marso 19 sa Arevalo

ILOILO CITY – Lauman sang publiko ang madamo nga palaguwaon sa highlight sang 50th Iloilo- Guimaras Paraw Regatta Festival subong nga semana.

Isa na diri ang Pinta Tawo nga ginapanguhan sang Junior Chamber International (JCI)- Iloilo nga hiwaton sa Marso 19 sang aga sa seafront sang Tatoy’s Manokan sa Arevalo.

Suno kay Mr. Pax Vera, 2013 president sang JCI- Iloilo, 10 ka mga models ang pintahan kag ipresentar sila sa publiko halin las-siete tubtob las-9:30 sa aga. Ang JCI na suno sa iya ang mahatag sang pinta nga gamiton sa lawas sang mga models.

Gindugang pa niya nga isa man ini sa mga pamaagi agud mapakita ang abilidad sang mga Ilonggo artists.