Masobra P1 million nga balor sang illegal drugs na-recover sa HVI, SLI sa Molo

ILOILO CITY– Na-recover ang masobra P1 million nga balor sang suspected shabu sa duha ka lalaki nga nadakpan sa drug buy bust operation sa Brgy. West Timawa, Molo las-3 kaina sang kaagahon.

Ginkilala ang mga nadakpan kanday Michael Seguiter alias Gringo, 35-anyos sang Brgy. Infante, Molo nga ginakabig Regional Priority Top 10 High Value Individual (HVI) sa illegal drugs, kag Earl Decla alias Intsik, 34-anyos sang Zone 3, Brgy. San Juan, Molo nga Street Level Individual (SLI).

Nabaklan ang duha sang isa ka sachet sang suspected shabu sa balor nga P16, 000.

Na-recover pa gid ang dugang nga tatlo ka dalagku nga sachets, pito ka elongated plastic sachets; kag 10 ka medium plastic sachets sang suspected shabu kay Seguiter.

Samtang, dugang nga tatlo ka sachets sang suspected shabu ang na-recover kay Decla.

May standard drug price nga P1,088,000 ang na-recover nga items nga ginbanta 160 grams.

Ginatinguhaan sang Aksyon Radyo Iloilo News Team nga makuhaan sang pahayag ang mga nadakpan nga preso subong sa Molo Police Station.