Bag-o nga teknolohiya gamiton sang MORE Power sa underground cabling sa Calle Real

ILOILO CITY – Nagapanghanda na ang MORE Power Iloilo para sa underground cabling kag magagamit sang bag-o nga teknolohiya sa paglubong sang mga kable sang kuryente.

Suno ini kay Engr. Bailey Del Castillo, Vice President for Network Development and Operations sang MORE Power, sa pag-aprubar sang Sangguniang Panlungsod sang ordinansa nga nagamandu sa pagbutang sa underground sang tanan nga linya sang kuryente kag mga kable sang telecommunication companies sa mga plaza, Sunburst Park kag tanan nga heritage properties sang siyudad.

Paathag ni Engr. Del Castillo, wala sang kabalak-an nga pagpugok sang trapiko sa ila pag-obra tungod magagamit sila sang ‘high technology’ nga horizontal directional drilling.

“Hindi na kailangan maghukay ng open trench. Dalawang hukay lang —isa sa entry and isa sa exit. With this method, mas madali [and] at the same time hindi maka-obstruct. Wala nang hukayan,” suno kay Del Castillo.

Pero antes ang pagbuho, magagamit suno kay Del Castillo sang Ground Penetrating Radar (GPR) agud makita ang ginaplastaran sang mga naga-egsister nga drainage, manholes, kag pipelines “para maiwasan natin na matamaan during the drilling.”

Natapos na ang topographic survey suno kay Del Castillo kag ginahulat na lang nila ang data antes matapos ang Marso kag ma-award ang kontrata sa kwalipikado nga contractor. “We are looking forward by April, ang groundworks will start.”

Unahon sang MORE Power ang pag-obra sa Calle Real, halin sa corner sang Plaza Libertad sa JM Basa Street tubtob sa corner sang Guanco Street nga ginabanta isa ka kilometro ang kalabaun.

Naga-coordinate man ang MORE Power sa mga telcos para maplastar sang maayo ang proyekto. – via Aksyon Hotline