Lokal

Former punong barangay Allan Aurelio i-reinstate nga kapitan sang North Baluarte, Molo

Liwat nga magapungko bilang kapitan sang North Baluarte, Molo si former Punong Barangay Allan Aurelio nga na-dismiss sadto tungod sa kaso nga Anti-graft and Corrupt Practices kag Malversation of Public Funds nga ginpasaka batok sa iya.

Ginpaathag ni Aurelio nga nag-ugat ang kaso sang 2015 sang may nagreklamo nga trabahador sa de-clogging nga ginhimo sa ila barangay nga wala maswelduhan bisan pa nga nakapirma siya sa payroll.

Tungod sini, ginpasakaan siya sang kaso sa Ombudsman sang pila ka mga kagawad sang barangay.

Natapos pa ni Aurelio ang una niya nga termino antes nagguwa ang desisyon sang Ombudsman.

Mayo 2018, liwat siya nga nagpapili sa pagka-punong barangay kag liwat man nga nagdaug.

Hulyo 2018, nagguwa ang desisyon sang Ombudsman kag ginpapanaugan siya sang perpetual disqualification. Tungod sini, ginbuslan siya sa puwesto ni Punong Barangay Marites Morga nga nagdaug sadto bilang first kagawad.

Nag-apelar sa Court of Appeals (CA) si Aurelio kag October 2020 nagpaguwa sang resolution ang CA nga nagabawi sa penalidad nga ginpapanaug sang Ombudsman kag ginbuslan ini sang isa lang ka bulan nga suspension.

Pero wala pa nakabalik gilayon sa puwesto si Aurelio. Kaina sang aga, ginpatawag siya upod kay Punong Barangay Morga sa opisina sang City DILG kag ginhambalan nga ipatuman na ang desisyon sang Court of Appeals.

Wala na ginkuwestiyon pa ni Aurelio kun ngaa subong lang ma-take effect ang desisyon sang CA. Suno sa iya, “importante nalimpyuhan ang ngalan ko.”

Ginpabutyag naman ni Aurelio nga mapadalagan siya liwat sa masunod nga Barangay kag SK Elections.

aksyonradyoiloilo

Aksyon Radyo Iloilo is the No. 1 station in both AM and FM bands in Iloilo based on April and September 2023 and June 2024 Kantar Media surveys.

Leave a Reply