7 ka tuig nga bata patay sang ginhimuslan sang iya amay sa Concepcion, Iloilo

CONCEPCION, Iloilo – Gin-ako sang e-bike driver ng ginhimuslan niya ang iya pito ka tuig nga bata nga babaye sa isa ka barangay sa Concepcion.

Nasapwan nga wala na nagahulag ang bata pasado las-singko sang kaagahon sang Marso 22 gani gindala sa Sara District Hospital pero gindeklarar nga dead-on-arrival.

Suno kay PEMS Edzel Ray Casia, imbestigador sang Concepcion MPS, ginrason sang amay nga nasal-an niya ang bata nga iya asawa tungod hubog siya.

Posible suno kay Casia nga na-suffocate ang bata paagi sa pagtabon sang iya baba.

Sa pag-imbestigar ni Casia, ginsugo sang amay ang iya walo ka tuig nga bata nga lalaki nga pukawon ang iya manghod agud makapreparar para sa pag-eskuwela pero wala na nagahulag kag mayami na. May nakita nga dugo sa pajama sang bata.

Nabudlayan naman ang mga pulis nga makuhaan sang statement ang iloy sang bata tungod nga apa kag “daw naapinan niya ang bana niya.”

Ginaproseso na suno kay Casia ang pag-ako sang amay para mahimuan sang written statement sa presensya sang iya abogado kag mapreparar ang pagpasaka sang kaso.

Ginkumpirmar ni Casia nga ipa-autopsy ang bangkay sang bata agud mahibaluan kun ano gid ang rason sang kamatayon.

Ang napatay nga bata ikaduha sa apat ka mag-ulutod.