Bangkay sang lalaki nga may pilas sang pagkatiro nasapwan sa Tigbauan
ILOILO — Nasapwan ang bangkay sang lalaki nga nagahapa, nakabaklid ang kamot kag may tabon nga packing tape ang mata sa Barangay Linobayan, tigbauan kahapon sang aga, Marso 23.
Nalabayan sang fish vendor nga si alyas Ron-Ron ang bangkay kag gilayon siya nagpanugid sa mga barangay officials.
Suno kay Ron-Ron, mabalik siya kuntani sa ila balay agud magkuha sang gamit tungod na-flat ang iya ginamaneho nga motorsiklo malapit sa lugar sang nasiplatan nga may nagahapa nga tawo sa talamnan.
Sa pagpangusisa sang Scene of the Crime Operatives (SOCO), may pilas sang pagkatiro sa wala nga parte sang ulo kag tuo nga abaga ang lalaki.
May na-recover man nga bag, kag duha ka IDs nga nakapangalan kay Allen Sanchez. Nasulat naman sa likod sang bayo sang bangkay ang “Para sa Bayan Toto Desilos, Ungka BJMP Munti Drug Group.”
Gin-identify naman sang iya landlady kay Allen Sanchez, 59-anyos ang bangkay. Ginpahayag sang landlady nga wala gid sang madamo nga impormasyon may kaangtanan sa iya pamilya nga ginsugid si Sanchez nga ginabanta 20 ka tuig na nga naga-board sa Sto. Niño Norte, Arevalo.
Nahibaluan lang nila nga yara sa Cebu ang iya pamilya pero wala sila nakahibalo kun paano sila ma-contact.
Ginbuyagyag man sang landlady nga may mga kaso sang pagpangawat si Sanchez sa iban nga lugar kag nakaagi man preso sa BJMP Ungka kag sa Nanga, Pototan.
Nagpanawagan naman si Panes sa kakilala ukon himata ni Sanchez nga mag-coordinate sa ila para makuha ang bangkay. Yara sa punerarya sa Tigbauan ang bangkay ni Sanchez.
ANGGULO SA ILLEGAL DRUGS
Ginasunod nga anggulo ang illegal drugs sa pagpatay kay Sanchez.
Suno ini kay Police Captain Mary Jane Panes, hepe sang Tigbauan Police Station, tungod may nakita nga suspected illegal drugs sa mga gamit sang biktima.
Pero gin-athag ni Panes nga padayon ini nga gina-imbestigaran, lakip na ang iban pa nga posible nga motibo.
