Biker nadisgrasya tungod sa kakulang sang warning device sa gina-obra nga dalan sa Taft North, Mandurriao

ILOILO CITY — Kulang ang warning device sang mga sub-contractors nga naga-obra sa dalan sa diin nadisgrasya ang naga-bike nga lalaki sa Brgy. Taft North, Mandurriao.

Ini suno kay Public Safety & Transportation Management Office head Jeck Conlu.

Nagabutang suno kay Conlu sang linya sang internet ang mga sub-contractors gani may litik sa tunga sang dalan.

Dugang niya, ginpatabunan na niya ang buho kag dapat matapos antes las singko sa aga agud wala na sang may madisgrasya pa.

Gin-athag man ni Conlu nga may permit halin sa Department of Public Works and Highways (DPWH 6) ang nasambit nga proyekto apang kulang ang warning device nga ginagamit sang mga sub-contractors.

Nadapatan man sang first aid ang nadisgrasya nga lalaki nga napilasan sa bibig tungod nakabulasot sa buho ang goma sang iya bike.