Lalaki nasapwan nga may pilas sang pagkatiro sa Leganes

ILOILO — Lima tubtob anum ka pilas sang pagkatiro ang naagum sang 29-anyos nga lalaki nga nakit-an sa talamnan sa Brgy. Calaboa, Leganes subong nga aga.

Suno kay PMS Leo Barnuevo, imbestigador sang Leganes Municipal Police Station, conscious pa ang biktima sang nakit-an kag nagapangayo sang bulig.

May gapos suno sa iya ang kamot sang biktima sang plastic tape kag alambre apang natigayon niya nga mahukas suno pa sa pulis.

Nakagapos man ang tiil sang lalaki dugang pa ni Barnuevo.

May na-recover nga isa ka slug sang indi pa ma-identify nga kalibre sang pusil sa area.

Dugang sang pulis, nagpakilala ang biktima nga si Glen Paloma kag nagpanugid nga tubtob apat ka lalaki ang naghimo sang krimen sa iya.

Samtang suno kay barangay tanod Ronie Pagayon nga nakakita sa lalaki, may nabatian siya nga lima tubtob anum ka lupok mga las-5 sa kaagahon.

May nakita man siya nga salakyan nga nagdulog sa area kag gilayon nga nag-arangka lakat pagkatapos sang asud-asod nga lupok.

Gilayon nga gindala sa ospital ang biktima.