Amay nga naghimulos, nagpatay sa iya 7-year old nga bata nga babaye sa Concepcion wala naga-engage sa illegal drugs — Punong Barangay

ILOILO—Wala naga-engage sa illegal drugs ang amay nga naghimulos kag nagpatay sa iya pito ka tuig nga bata nga babaye sa Concepcion, suno sa ila Punong barangay.

Suno sa iya, “Wala siya sang record nga nagagamit sang illegal drugs pero natabo ina kay may iban nga nag-trigger kun ngaa nahimo niya ina. Kay palahubog siya mo. Permi siya hubog. Daw kada-gab-i ga-inom siya ya.”

Antes ang insidente, nag-inom ang amay upod sa iya mga abyan suno sa Punong barangay kag nagpauli.

Gindugang sang kapitan, “Before [siya nagpauli] kuno hambal sang kaupdanan niya, daw indi na manami nga tinaga ang iya gina-istorya.”

Ginpabutyag sang kapitan nga “daw may gamay nga deperensiya sa paminsaron” ang amay.

Marso 22 sang nasapwan nga wala na nagahulag ang bata pasado las-singko sang kaagahon gani gindala sa Sara District Hospital pero gindeklarar nga dead-on-arrival.

Gin-ako sang amay nga ginhimuslan niya ang iya pito ka tuig nga bata nga babaye.