Utod nga tiil sang tawo nasapwan sa kilid sang dalan sa Bacolod City
Nakit-an sa kilid sang karsada ang duha ka utod nga tiil sang tawo sa Barangay Villamonte, Bacolod City pasado la-1 kaina sang kaagahon, kahapon, Marsao 29.
Ini ang ginkumpirmar ni Police Captain Greecky Cayao, hepe sang Bacolod City Police Station 4.
Sa kilid sang dalan sa gasolinahan nakita ang duha ka utod nga tiil nga nasulod sa transparent nga plastic.
PAGPAMAHOG
Ginhaboy sang nakasakay sa motorsiklo ang duha ka utod nga tiil sang tawo nga nakasulod sa transparent nga plastic base sa CCTV camera nga nakuha sa establishment.
Suno kay Police Captain Cayao, may sulat nga ginbilin sa suludlan nga plastic. Pero nagpamalibad ang kapulisan nga ibuyagyag ang kaundan sang sulat tungod nagapadayon pa ang imbestigasyon.
Kun hangpon suno kay Cayao ang sulat, pagpamahog ang ginalantaw nila nga anggulo sa pagbilin sang tiil.
Gindala na sa punerarya ang tiil sang tawo samtang nagapadayon ang imbestigasyon sang kapulisan.
Sang Enero 25, may naghaboy man sang suludlan sang ice cream nga may unod nga duha ka utod nga kamot sa material recovery facility sang Purok Kagaykay, Barangay 2, Bacolod City.
