Bangkay sang babaye nasapwan sa sulod sang lodging house sa Mandurriao

ILOILO CITY — Patay na sang nasapwan ang babaye sa sulod sang kwarto sang Queen’s Court Drive-in Hotel sa Brgy. Bolilao, Mandurriao kahapon sang aga, Abril 1.

Ginpahayag ni Police Lt. Joebert Amado, deputy chief of police sang Mandurriao Police Station, base sa impormasyon halin sa room attendant, las-6:30 kaina sang aga sang nagguwa sa kuwarto ang lalaki nga ginabanta 30-anyos.

Gilayon ginpalapitan sang attendant ang lalaki agud pamangkuton kun ma-check out na sila sang upod niya nga babaye. Nagsabat ang lalaki nga nagapaligo pa ang upod niya nga babaye.

Sang gin-check sang attendant ang babaye, wala nagasabat rason nga ginsulod niya kag nadiskubrehan nga patay na, wala sang pang-idalum nga panapton kag may lagub sa guya.

Magluwas diri, nakita man ang mga buka nga botelya kag nagalapta na ang mga kagamitan.

Wala naman na notisyaran nga nagbiya na ang lalaki, suno sa attendant.

Suno kay Amado, taga-Concepcion, Iloilo ang babaye.