Balay nasunog sa Santa Barbara
ILOILO — Padayon nga gina-imbestigaran sang Bureau of Fire Protection- Sta. Barbara ang ginhalinan sang sunog nga nagluntad sa balay sa Burgoz St., Brgy. Zone 2, Sta. Barbara pasado las-7 kagab-i.
Suno kay SFO3 Terzo Obera, Acting Municipal Fire Marshall sang BFP- Sta. Barbara, dako na ang kalayo sa nagakasunog nga balay nga ginapanag-iyahan ni Ma. Carmen Suñer sang nag-abot sila sa area.
Gilayon nga natapna ang kalayo suno kay Obera kag wala na naglaton pa sa kaiping nga mga panimalay.
Wala sang tawo ang balay sang nagluntad ang sunog suno pa kay Obera.
Totally damaged ang balay nga human sa mixed materials.
Dugang ni Obera, duha ka fire truck sang BFP- Sta. Barbara kag tanker truck sang BFP-Pavia ang nagresponde sa area.
