2 ka pulis nga lakip sa ginkasuhan sa pagtiro kay Glen Paloma nga ginwigit sa Leganes gin-identify ni ICPO Director Joeresty Coronica

ILOILO CITY – Ginhingadlan ni Iloilo City Police Office Director PCOL Joeresty Coronica ang duha ka pulis nga nalakip sa ginkasuhan sang frustrated murder kag paglapas sa Section 29 (Criminal Liability for Planting of Evidence) sang RA 9165 (Comprehensive Dangerous Drugs Act of 2002) may kaangtanan sa pagkastigo kag pagtiro kay Glen Paloma nga ginwigit sa Brgy. Calaboa, Leganes sang Marso 26, 2023 sang kaagahon.

Ginkumpirmar ni PCOL Coronica nga nagkadto sa iya kahapon sang aga kanday PSSg Enrico Gonzales kag PEMS Jessie Rubio nga lunsay na-assign sa Intelligence Unit sang ICPO kag nagpa-athag sang ila bahin.

Ginpanginwala sang duha ang kahilabtanan sa natabu kay Paloma.

Sa pagpati ni PEMS Rubio suno kay PCOL Coronica, ginbalikan lang siya ni Paloma tungod siya ang nagdakup sa biktima sa kaso nga pagpangawat sang 2014.

Una na nga ginlawag ni IPPO Director PCOL Ronaldo Palomo nga ginkasuhan kanday John Ian Leda, tag-iya sang Abe’s Payag Restaurant sa C1 road, Pavia; security guard sang restaurant nga si Ricky Giluani; duha ka John Does; kag ang duha ka pulis.

Sa panaysayon sang biktima suno kay PCOL Palomo, nasal-an siya ni SG Giluani nga kawatan sang nagdulog siya sa atubang sang restaurant agud kay-uhon ang kadena sang iya bisekleta.

Ginpabutyag ni Paloma nga natandaan niya ang nawong sang mga nagkastigo sa iya rason nga nakapanugid sa police.

Naka-confine pa sa ospital si Paloma kag ginabantayan sang duha ka pulis halin sa Leganes MPS.

Background: https://bit.ly/4188Wa0