P400K cash, mga gamit lakip sa mga nakawat sa sulod sang hotel room sa Passi City

ILOILO — Nakawat ang P400,000 nga cash kag iban pa nga kagamitan sang negosyante sa sulod sang kwarto sa hotel sang isa ka resort sa Brgy. Sablogon, Passi City kahapon sang aga, Abril 18.

Suno kay Police Lieutenant Colonel Aron Dabi Palomo, hepe sang Passi City Police Station, aga na sang natukiban sang biktima nga si Rafail Agcaoili, 62-anyos nga wala na ang iya bag nga may unod nga kwarta kag iban pa nga kagamitan.

Base sa initial investigation sang Passi City police, nag-agi sa sliding window ang kawatan rason nga nakasulod sa kuwarto kag ginabanta natabo mga sas-11 sa gab-i tubtob las-12 sang tungang gab-i.

Wala nabatyagan sang biktima ang pagsulod sa iya kuwarto.

Dugang pa ni Palomo, may mga persons of interest na sila kag nalakip diri ang mga empleyado sang resort. Wala man sang CCTV ang resort.

Magluwas sa cash, nakuha man suno kay Palomo, ang relo nga nagabalor sang P1.4 million, P18,000 worth nga bracelet, kag iban pa nga gamit.