Isa ka section sa WVSU Pototan Campus nagklase sa idalum sang puno sang kahoy tungod ‘indi ma-agwantahan ang init sa classroom’

ILOILO – Napilitan nga magklase sa idalom sang puno sang kahoy ang isa ka section sa West Visayas State University (WVSU)- Pototan Campus tungod sa tuman ka init sa sulod sang classroom.

Suno sa manunudlo nga si Ms. Claudine Mae Leysa, indi makatutok sang maayo sa ila klase ang mga estudyante tungod nagapadugang sang kakapoy ang kainit sang panahon. Indi man suno sa iya komportable ang mga estudyante kun yara sa sulod sang classroom.

Sa pagkamatuod suno sa iya, may estudyante nga gin-atake sang asthma gani nagpangabay ang iban niya nga estudyante nga sa guwa sang classroom lang sila anay maghiwat sang klase.

Natabu ini kahapon, Abril 19, halin las-dos tubtob las-singko sa hapon sa klase niya sa 2nd year Information System students.

Plano man niya nga himuon ini sa iban pa nga estudyante.