Mga eskwelahan sa Iloilo amat-amat na nga makasaylo sa distance learning tungod sang sobra ka init nga tiempo

Gina-ekspektar sang Department of Education (DepEd)- Division of Iloilo nga may mga eskwelahan na nga maka-amat-amat saylo sa distance learning halin sa face-to-face classes.

Ini suno kay Schools Division of Iloilo Public Information Officer Leonil Salvilla tungod sa pag-reiterate sang DepEd central office sang memorandum 37 series of 2022 nga nagahatag sang ligwa sa mga eskwelahan nga magpatuman sang modular learning kun indi na makatuon sang ensakto ang mga estudyante tungod sa mainit nga panahon.

Nakadepende sa School heads suno kay Salvilla kun ano ang mangin set-up sang eskwelahan, tungod lain-lain man ang sitwasyon kadalugar.

Ginklaro ni Salvilla nga wala ginasuspender sang DepEd ang klase, kundi nagahimo lang sila sang amat-amat nga tikang agud masolbar ang problema nga ginapangatubang sang mga estudyante.

Sang nagligad nga semana, gin-report sang Schools Division of Iloilo nga may mga na-record na sa mga buluthuan nga may mga estudyante nga nagsakit ang ulo kag nagdugo ang ilong tungod sa indi ma-agwantahan nga init sang panahon.

Agosto 2022 sang ginbalik sang DepEd ang full face-to-face classes.