Carnapper sang motorsiklo arestado sang gin-post sa social media ang ginkawat niya nga motor
ILOILO CITY — Apat ang nadakpan sang kapulisan lakip na ang isa ka menor-de-edad nga ginreklamo nga nagpangawat sang motorsiklo nga gin-park sa Iznart St., Brgy. Danao, City Proper.
Ginkilala ang mga nadakpan kanday Joshua Corsino, 25-anyos sang Badiangan, Mina; Rommel Robles, 26-anyos sang Canoan, Estancia; Ranjit Magay, 30-anyos sang Hipodromo City Proper; kag isa ka menor-de-edad.
Suno kay Capt. Peter John Ramos, hepe sang City Proper Police Station, nagpangayo sang bulig sa ila opisina ang tagreklamo nga si Job Misajon, 39-anyos sang Sinikway, Lapuz. Ginpahayag ni Ramos nga nakit-an ni Misajon nga naka-post sa marketplace sa social media ang iya motorsiklo. Nakilala niya ini paagi sa temporary plate number.
May police nga nagpakuno-kuno nga buyer kag gin-operate nila ang nagabaligya sang motorsiklo. Una nga nadakpan si Corsino upod ang menor-de-edad sa plaza sang New Lucena.
Ginbuyagyag naman ni Corsino nga ginbaligya lang sa iya ni Robles ang motorsiklo sa balor nga P18,000. Sa follow up operation sang police, nadakpan si Robles kag Magay sa Brgy. Villa Anita, City Proper. Dala nila ang peke nga deed of sale kag certificate of registration sang motorsiklo nga nakapangalan kay Joshua Corcino.
