Mga ambulant vendors nagpa-utwas sang sentimiento batok sa proposed ordinance ni Councilor Johnny Young nga limitahan ang oras sang ila pagbaligya

ILOILO CITY – Hugot nga ginapamatukan sang mga ambulant vendors ang ginaduso nga ordinansa ni Iloilo City Councilor Johnny Young nga pasugtan lang sila makabaligya halin las-singko sa hapon tubtob las-singko sa kaagahon.

Suno kay Salome Ta-al, naakig ang mga ambulant vendors sa Molo kay Young tungod ma-apektuhan ang ila pangabuhian kun makapasar ang ordinasa. Diri lang sila suno sa iya nagasalig sang ila pang-adlaw-adlaw nga kinahanglan.

Nagpabutyag man siya nga posible wala na sang may mabakal sa ila tungod temprano pa ang iban nila nga mga customers.

Nanindugan naman si Young nga may naga-egsister nga regulasyon ang Special Services Division (SSD) nga las-singko sa hapon tubtob las-singko sa kaagahon lang makabaligya.

Pero nagsabat si Councilor Rudolph Ganzon nga wala sang legal basis ang ginaduso nga ordinansa ni Young tungod wala sang ordinansa nga nagamandu sini.

Kaina sang aga, ginhiwat ang Committee Hearing sa nasambit nga proposed ordinance ni Young.