Asawa pilason sang natiruhan sang iya bana sa Jaro; Bana patay sang gintiro ang kaugalingon

ILOILO CITY – Pilason ang asawa sang natiruhan sang iya bana sa Brgy. Cuartero, Jaro kagab-i, April 25.

Samtang napatay naman ang bana sang gintiro niya ang iya kaugalingon, suno sa Jaro police.

Sa pagpangusisa sang Aksyon Radyo Iloilo news team, napilasan sa wala nga tuhod si Sara, 61, kag gilayon nga gindala sa Iloilo Mission Hospital. Naigu naman sa ulo ang bana nga si Romeo, 66.

Suno kay Barangay Kagawad Jomar Lapidante, lima ka lupok ang nabatian sang mga residente sa palibot.

Antes sini, masami nga naga-away ang mag-asawa, dugang ni Lapidante.

Suno kay Ida, daughter-in-law sang mag-asawa, nagabaisay ang mag-asawa tungod nagapamilit si Romeo nga magsulod sa kuwarto ni Sara. Wala naga-upod tulog ang duha.

Nakibot lang siya suno sa iya sang ginbunot sang iya father-in-law ang ginataklos nga pusil tubtob nag-agaway sila. Gintawag pa ni Ida ang iya sister-in-law nga nagbulig man sa pagtambag sa mag-asawa.

Gilayon nga nagpangayo sang bulig sa guwa sang balay si Ida kag pagbalik niya, pilason na si Sara samtang nagahuray-ad ang iya father-in-law.