Security preparation sa WVRAA Meet 2023 plastado na
AKLAN — All set na ang security preparation sang Aklan police para sa Western Visayas Regional Athletic Association (WVRAA) Meet 2023 nga masugod subong, Abril 26.
Ini agud masiguro ang seguridad sang delegasyon halin sa magkatuhay nga lugar sa Rehiyon 6, suno kay Police Captain Merriefin Carisusa, hepe sang Makato Police Station. Sa Makato hiwaton ang opening sang WVRAA Meet 2023.
May border control kag rerouting sang mga salakyan nga ipatuman agud malikawan ang pagpugok sang trapiko.
Ginpasiguro naman ni Makato LGU Public Information Officer Ralph Maypa nga gwardiyado sang mga otoridad ang magkatuhay nga billeting stations sa diin matiner ang mga delegasyon. Maayo man suno sa iya ang koordinasyon sang nagkalain-lain nga opisina agud mangin tayuyon ang pinakadako nga sporting event sa Rehiyon 6.
Matakop ang WVRAA Meet sa Abril 30 nga pasakopan sang linibo ka delegasyon halin sa Aklan, Antique, Capiz, Iloilo, kag Negros Occidental. Diri pilion ang ipadala nga delegasyon sang Western Visayas para sa Palarong Pambansa.
