3 ka electric companies sa Iloilo province nagpaathag sa lapnagon nga power outage sa sulod sang 2 ka adlaw
Nagpaathag ang mga manager sang Ileco I, II, kag III sa nagluntad nga power outage sa Iloilo province sang Huwebes kag Biyernes.
Suno kay Iloilo Electric Cooperative (ILECO) III General Manager Atty. James Balsomo, indi dapat pagbasulon ang mga distribution utilities kapareho nila tungod naga-supply lang sila sa mga konsumidor sang elektrisidad.
Ginpahayag pa niya nga bisan sila nga mga distributors ang nakibot sa gulpi nga pag-trip-off ukon pagkadula sang supply sang power sa transmission line nga gina-manage sang National Grid Corporation of the Philippines.
Ginplastar man ni Balsomo nga “one way traffic” ang nagakatabo sa diin ang mga power plants ang naga-generate sang power kag ginapaagi sa linya pakadto sa transmission sang NGCP. Nagasalig lang ang mga distributors sa ginahaboy sa ila nga power.
Ginahaylo naman ni ILECO I General Manager Michael Paguntalan, Jr. ang pamunuan sang NGCP nga indi magpaguwa sang sala nga impormasyon kag akuon ang ila kapaltahan kun may yara gid man.
Nagpanawagan liwat ang tatlo ka mga general managers nga iplastar ang long term solutions sang NGCP.
Nagapadayon pa ang Zoom meeting nga ginpatawag nanday Iloilo Governor Arthur Defensor, Jr. kag Uswag Ilonggo party-list representative James Ang sa taga-NGCP kag mga Public Electric Utility Companies.
