Lalaki patay sang nabungguan ang ginamaneho nga motorsiklo sa Antique

Patay ang 54-anyos nga lalaki sang nabungguan sang salakyan ang ginamaneho nga motorsiklo sa Brgy. Guintas, Hamtic, Antique pasado las-10 sa aga sang Sabado, Abril 29.

Ginkilala ang biktima kay Vicente Perfas, residente sang Brgy. Asluman, Hamtic samtang ang driver sang salakyan si Glen Ford Billones, 36-anyos, residente sang Poblacion, Tibiao.

Suno kay Police Staff Sergeant Rymer Mabaquiao, imbestigador sang Hamtic Municipal Police Station, nagasumalangay ang motorsiklo kag ang salakyan.

Halin sa Iloilo kag pauli na si Billones, suno kay Mabaquiao, sang mapiyungan kag naglaksam ang ginamaneho nga salakyan sa pihak nga linya rason nga nabungguan niya ang motorsiklo.

Nag-swerve pa ang salakyan suno kay Mabaquiao antes nahulog sa creek.

Ginhingagaw dala sa ospital ang biktima apang gindeklarar dead-on-arrival.

Yara sa custody sang Hamtic MPS si Billones.