Truck kag iban pa nga heavy equipment ginsunog sang mga armado nga lalaki sa Leon

ILOILO — Ginsunog ang elf truck kag partially damaged naman ang backhoe, pison, kag road trimmer sang ginsunog sa Brgy. Cabunga-an, Leon sang Mayo 5 sang gab-i.

Suno kay Police Captain Rodel Pasion, OIC sang Leon Municipal Police Station, nakabaton sila sang report kagab-i halin sa trabahante sang construction company nga ginsunog ang pila nila ka mga heavy equipment apang kaina sang kaagahon lang nakadtuan tungod sa mamunog nga ulan.

Ginpabutyag sang witness, suno kay Pasion, nga lima ka armado nga mga lalaki ang naghimo sang krimen.

Dugang sang pulis, nakabuyagyag ang mga lalaki sa witness nga “may mga trabahante ang kumpanya nga wala mabayaran” rason nga ginasundan ini nga motibo sang kapulisan.

Nagapadayon sa subong ang imbestigasyon sang Leon police kag BFP sa insidente.

Naka-coordinate naman ang kapulisan sa Philippine Army, suno pa sa pulis.

Ang kompaniya nga nagapanag-iya sang elf truck kag mga heavy equipment ang naga-construct sa access road halin sa Leon padulong sa Alimodian, suno pa kay Pasion.