1 patay, 3 pilason sang nagtakilid ang elf truck nga may karga nga kawayan sa Maasin
ILOILO — Isa ang patay kag tatlo ang pilason sang nagtakilid ang elf truck nga may karga mga kawayan sa Brgy. Magsaysay, Maasin kahapon, May 8.
Ginkilala ang napatay kay Felipe Galache, 60-anyos nga nagapungko sa mga kawayan nga ginakarga sa likod sang truck.
Pilason naman ang driver nga si Norlito Perante, 58-anyos; kag mga nagapungko sa passengers seat nga sanday Mercedita Pedato, 62-anyos; kag Kennedy Perante, 32-anyos.
Suno kay Police Captain Jayson Mausig, Officer-in-Charge sang Maasin Municipal Police Station, padulhog na kuntani sa banwa ang truck sang nagtakilid pag-abot sa kurbada nga porsyon sang dalan.
Posible suno kay Mausig nga wala nasarangan sang truck ang karga nga kawayan sang nagapadulhog na rason nga nagtakilid.
Tungod sini, natampukan sang kawayan si Galache.
Gilayon naman nga gindala sa ospital ang apat, pero gindeklarar nga dead-on-arrival si Galache samtang padayon pa nga ginabulong ang tatlo niya ka upod.
