3 patay, 9 pilason sang naigo sang kilat sa Banate

ILOILO — Tatlo ang patay kag siyam ang pilason sang naigu sang kilat sa Sitio Giragid, Brgy. Magdalo, Banate kahapon, Mayo 8.

Suno kay PLt. Dandy Ilalto, hepe sang Banate Municipal Police Station, nagapanilong sa payag ang 12 ka mga mangunguma tungod sa mamunog nga pag-ulan. Yara sa tunga sang kampo ang payag.

Gulpi lang suno sa iya nagpangilat kag naigu ang payag.

Gilayon nga gindala sa ospital ang 12 pero dead-on-arrival ang tatlo nga kanday Mila Soberano, 38-anyos; Rosalie Soberano, 48-anyos; kag 14-anyos nga nagabusong.

Padayon naman nga ginabulong ang siyam ka mga mangunguma.