Gun ban ipatuman sa Manggahan Festival 2023 sa Guimaras

GUIMARAS – May ipatuman nga gun ban sa highlight sang Manggahan Festival 2023 sa Guimaras.

Ini suno sa Guimaras Police Provincial Office sang gin-aprubahan ni PNP Chief, Police General Benjamin Acorda ang request sang Police Regional Office (PRO) 6 nga gun ban agud masiguro nga safe ang paghiwat sang Manggahan.

Ipatuman suno sa GPPO, ang gun ban halin Mayo 19 las-12:01 sang kaagahon tubtob Mayo 23, las-11:59 sang gab-i.

Tungod sini, suspendido ang permit to carry firearms outside residence magluwas lang sa personnel sang Philippine National Police (PNP), Armed Forces of the Philippines (AFP), kag miyembro sang Law Enforcement Agencies nga yara sa ila trabaho.

Nagpangabay man ang Guimaras police sang koordinasyon sang publiko.

Ang highlight sang Manggahan hiwaton sa Mayo 19 tubtob 22 sa diin madamo ang nakalinyada nga mga aktibidad.