Paid Parking Ordinance sang Iloilo City Government, ipatuman sa Mayo 15

ILOILO CITY – Maga-umpisa na sa Lunes, Mayo 15 ang pagpatuman sang Paid Parking Ordinance sa pila ka mga areas sa City Proper suno kay Public Safety and Transportation Management Office (PSTMO) Head Jeck Conlu.

Sakop sang Paid Parking Ordinance ang mga dalanon sa City Proper nga naga-angut sa Muelle Loney area. Lakip sa mga ginpangtumod ni Conlu ang Aldeguer, Arroyo, Arsenal, Solis, kag Peralta streets.

May paid parking man nga ipatuman sa Guanco kag porsyon sang Ortis Street.

Magasugod ang pagpanukot sa mga naga-parking, las-8 sa aga tubtob las-5 sa hapon, Lunes tubtob Biyernes. Ang taga-Local Economic Enterprise Office (LEEO) ang in-charge sa pagpanukot suno kay Conlu kag ang mga personnel naman sang PSTMO ang magabantay sa mga violators kag sa magpamalibad nga magbayad.

Gin-athag man ni Conlu nga indi authorize nga magpanukot ang taga-PSTMO. Dapat nga naka-uniform kag naka-ID ang manukot nga taga-LEEO.

May ticket nga ihatag sa mga tag-iya sang salakyan kun diin nakabutang ang oras sang pag-parking. Isipon naman kun pila ka oras ang kalawig sang pag-park sang salakyan pagbalik sang driver.

P15 ang bayad para sa una nga duha ka oras sang mag-park nga motorsiklo, P20 sa mga tricycle, P25 sa mga light vehicle pareho sang awto, kag P30 naman sa mga medium vehicle pareho sang delivery truck.

P5 ang dugang nga bayad sa mga succeeding hours sang pag-park sang mga salakyan.

Gin-athag ni Conlu nga sa City Proper lang anay ipatuman ang paid parking kag posible ipatuman man ini sa iban nga mga areas sang siyudad sa palaabuton. – via Firingline