Tanan nga haligi sang Ungka flyover naga-usmod — 3rd Party Consulting Firm
ILOILO CITY – Naga-usmod ang tanan nga haligi sang Ungka Flyover, base sa report sang Abinales Associates Engineers plus Consultants.
Sa Regional Development Council (RDC) meeting, ginpresentar ang cumulative settlement report halin sa Department of Public Works and Highways (DPWH) 6.
Gin-presentar ni Engr. Adam Abinales, chief executive officer (CEO) sang consulting firm nga may nakit-an nga vertical displacement ukon pag-usmod sa 16 tanan ka haligi sang flyover.
Sa monitoring sang ahensya halin Mayo 2022 tubtob Abril 14, 2023, may pinakamataas nga pag-usmod sa ikalima nga haligi sang flyover nga nagalab-ut sa 583 millimeters. Samtang sa ika-anum nga haligi may 488 millimeters nga pag-usmod kag sa ika-apat nga haligi ang may 431 millimeters nga settlement.
Magluwas sa ika-apat, ikalima, kag ika-anum nga haligi, may paghulag man sang seven (7) millimeters sa haligi uno; 82 millimeters sa ikaduha nga haligi; 151 millimeters sa ikatatlo; 17 millimeters sa ikawalo nga haligi; 21 millimeters sa ikasiyam; 20 millimeters sa ikapito, ika-10, kag ika-11 nga haligi; 88 millimeters sa ika-12; 114 millimeters sa ika-13; 41 millimeters sa ika-14; 51 millimeters sa ika-15 kag 27 millimeters sa ika-16 nga haligi.
