Lalaki patay sang ginbuno sang iya kasilingan sa Dumangas
ILOILO — Dead-on-arrival sa ospital ang 41-anyos nga lalaki sang ginbuno sang iya kasilingan sa Barangay Bantud Fabrica, Dumangas, Iloilo, kahapon, Mayo 20.
Ginkilala ang biktima kag Winnie Gubane, may pilas sa nagkalain-lain nga parte sang lawas.
Samtang, ginkilala naman ang suspek kay Mark Surita, 33-anyos.
Suno kay Police Master Sergeant Ramon Baylon Jr., imbestigador sang Dumangas Police Station, ma-park na kuntani sang iya motorsiklo ang biktima sang ginpalapitan sang suspek kag ginbuno.
Sa tuo nga kamot una na-igo si Gubane kag sang nahulog sa iya sa motorsiklo ginbuno pa gid sang suspek.
Base sa impormasyon sang pulis, magka-upod sadtu sa obra ang biktima kag suspek apang gina-usisa pa sang kapulisan kun pwede ini ma-angut sa krimen.
At-large ang suspek kag wala man na-recover ang kutsilyo nga gingamit sa krimen.
