Mag-live in partner nga senior citizen pilason sang ginmartilyo sang kawatan nga nagsulod sa ila balay sa Balasan

ILOILO — Pilason ang mag-live-in partner sang kawatan nga nagsulod sa ila balay sa Purok 3, Brgy. Kinalkalan, Balasan, Iloilo pasado las-otso kagab-i, Mayo 20.

Ginkilala ang mga biktima nga kanday Atty. Jose Jalandoni, 94-anyos kag Lydia Molleno, 81-anyos.

Suno kay PMSg Ramon Alan Elambre, imbestigador sang Balasan Municipal Police Station, ginsulod sang duha ka lalaki nga naka-face mask ang balay sang mga biktima.

Sa imbestigasyon sang pulis, nagdiretso ang isa ka lalaki sa kusina, kag gintayaan sang pusil ang driver kag maid ni Jalandoni.

Nagapahuway pa lang sa ila kwarto ang mag-live-in partner sang nagsulod ang isa sa mga suspects rason nga ginlampusan sang lalaki ang mga biktima sang martilyo sa ulo.

Nakapangayo pa sang bulig si Molleno suno sa pulis.

Wala sang may nadula nga personal nga kagamitan ang mag-live-in partner. Apang, nakuha sang mga suspetsado ang hard drive sang CCTV.

May pilas sa ulo ang mag-live-in partner rason nga gindala sa ospital kag padayon nga ginabulong.