Army reservist patay sang gintiro sang tanod sa San Enrique, Iloilo

ILOILO — Pilas sa ulo ang gintunaan sang kamatayon sang 29-anyos nga army reservist sang gintiro sang 41-anyos nga tanod commander sa Brgy. Poblacion Ilaya, San Enrique, pasado las-10 Mayo 24 sang gab-i.

Ginkilala ang biktima kay Lino Palomar sang Brgy. Arac, Passi City samtang suspect naman si Rio Calanao sang Brgy. Polacion Ilawod.

Suno kay Police Capt. Johnny Oro, hepe sang San Enrique Police Station, pista sa Brgy. Poblacion Ilaya sang natabo ang insidente.

Nagasaut sa karsada ang biktima sang naglabay ang suspect sakay sa iya multicab. Nagpundo ang suspetsado kag nagbaisay sila nga duha.

Gin-areglo man ang magtimbang nga bahin kag nagdumdom ang biktima nga naresolbar na ang gamo. Apang hinali lang siya gintiro sang suspect sang wala mahibaluan nga kalibre sang pusil.

Wala sang may na-recover nga basiyo sang bala sa crime scene.

Nalagyo si Calanao pagkatapos sang krimen apang may impormasyon suno sa police nga ma-surrender siya.