“Guimaras” sign sa Jordan agaw-atensyon sa mga nagatabok sa probinsya

Panibag-o nga “instagrammable spot” ang makita sa isla tungod sang ginpahamtang nga “Guimaras” sign sa bukid sang Brgy. Rizal, Jordan.

Suno kay Governor JC Rahman Nava, pribado nga kompaniya ang nakapaminsar kag nag-propose sa pagpahamtang sang proyekto kag nagbulig lang ang provincial government sa pagpatigayon nga ma-construct sa area.

Tungod sini, nadugangan ang atraksyon sa isla, kag makita gid sang mga pasahero sang sakayan kag barko nga nagalabay ukon nagapadulong sa lugar suno kay Nava.

Pahayag niya, “At least may gamay nga atraksyon kun nagapasulod ka pa lang sa Guimaras. Kun makita mo na, daw mapilitan ka nga magpa-picture gid… Kun ara ka da may istoryahan kamo… instagrammable.”

Ginpabutyag ni Gov. Nava nga gintinguhaan gid nila nga makahingabot nga matapos antes ang Manggahan festival pero wala naka-abut tungod sang pag-ulan.

Ginalantaw sang provincial government ang puwede pa nila nga madugang agud mapa-enhance pa gid ang proyekto.

Ang amo nga proyekto kasubong sang “Hollywood” sign sa Los Angeles, California nga isa sa mga American landmark kag cultural icon.