21 anyos nga gin-report nalumos sa Arevalo nakapauli na sa ila balay

ILOILO CITY — Nakapauli na si John Mark, ang 21-anyos nga una gin-report nalumos sa Zone 3, Sto. Niño Sur, Arevalo.

Ini ang ginkumpirmar sang tiyo ni John Mark nga si Nilo.

Sa interview sang Aksyon Radyo Iloilo kay John Mark, naka-inom siya sang natabo ang insidente kag wala na kadumdom nga nagpabaybay siya.

Dugang niya, gindala siya sang balud kag sang naumpawan sa kahulugbon, nanotisyaran niya nga yara na siya sa area sang Calumpang, Molo.

Ginlangoy na lang niya tubtob nga nakalab-ut sa San Juan, Molo.

Suno pa kay John Mark, halin sa Calumpang, ginlakat niya padulong sa Fort San Pedro, City Proper antes ginlakat liwat pauli sa ila balay sa Sto. Niño Sur.

Pasado las-10 kagabi sang naka-abot sa ila balay si John Mark.

Madumduman nga sang Huwebes sang gab-i, una gin-report nga nalunod si John Mark.

Nagpasalamat man ang iloy ni John Mark sa Philippine Coast Guard- Iloilo kag tanan nga rescue groups nga nagbulig pangita kay John Mark. —via Justice Savvanah Pamplona