10 ka floodgates ipang-install sa mga outfall sang drainage sa Iloilo agud masolusyunan ang mga pagbaha kun magtaub
P110-million ang budget sang Department of Public Works and Highways (DPWH) sa 10 ka mga floodgates nga ipahamtang sa mga drainage outfall sa Iloilo City agud masolusyunan ang mga pagbaha sa siyudad kun magtaub.
Ginkumpirmar ini ni DPWH 6 Asst. Regional Director Jose Al Fruto. Suno sa iya, nasuguran na ang pagbutang sang mga floodgates kag target ini nga matapos subong nga tuig.
Lakip sa proyekto ang pagpabutang man sang mga pumping stations sa 10 ka mga floodgates.
Ginpa-athag ni Fruto nga wala ini malakip sa P6.2-billion nga balor sang comprehensive drainage system project sa siyudad nga may duha ka mga pumping stations.
Suno sa iya, ang una nga proyekto ang para lang sa pagbaha nga dala sang ulan samtang ang ginahimo subong ang para naman malikawan ang pagbaha kun magtaub.
Una na ginpahayag sang operator sang pumping station sa General Luna Street sa City Proper nga napamangkutan sang Aksyon Radyo nga nagabaha ang pila ka mga dalanon sa siyudad kun magtaub tungod naga-agi ang tubig sa mga outfall sang drainage nga wala sang floodgate kag naga-awas sa mga karsada.
